ईगल न्यूज अमळनेर प्रतिनिधी एस एम पाटील
*अमळनेरच्या सिंधूताई भोईची संघर्षातून यशाकडे गरुडझेप*
“परिस्थिती कशीही असो, जर मनामध्ये जिद्द आणि हातामध्ये कष्ट करण्याची तयारी असेल, तर माणूस कोणत्याही संकटावर मात करू शकतो,” हे अमळनेर येथील एका रणरागिणीने आपल्या कर्तृत्वाने सिद्ध करून दाखवले आहे. विजय स्टील सेंटर परिसरातील भाजीपाला व्यावसायिक सौ. सिंधूबाई गणेश भोई (बेंद्रे) असे या स्वाभिमानी महिला उद्योजकाचे नाव आहे. अत्यंत प्रतिकूल परिस्थितीशी दोन हात करत, केवळ भाजीपाल्याच्या हातगाडीवर त्यांनी आपल्या कष्टाच्या जोरावर संसाराचे नंदनवन फुलवले आहे.संघर्षाची गाडी अन् कष्टाची वाट सिंधूबाई भोई यांचा हा प्रवास अजिबात सोपा नव्हता. कौटुंबिक जबाबदाऱ्या आणि आर्थिक चणचण समोर असताना त्यांनी कधीही नशिबाला दोष दिला नाही. कुटुंबाला हातभार लावण्यासाठी त्यांनी भाजीपाला विक्रीचा व्यवसाय सुरू करण्याचा धाडसी निर्णय घेतला. अमळनेर येथील विजय स्टील सेंटर परिसरात भाजीपाल्याची हातगाडी लावून त्यांनी आपल्या व्यवसायाचा श्रीगणेशा केला.
सकाळी पहाटे लवकर उठून बाजारातून ताजा भाजीपाला आणण्यापासून ते रात्री उशिरापर्यंत हातगाडीवर उभे राहून ग्राहकांना सेवा देण्यापर्यंत, सिंधूबाई यांचा दिनक्रम अत्यंत कष्टमय राहिला. उन्हाची परवा न करता आणि पावसाची तमा न बाळगता, भाजीपाल्याच्या या हातगाडीच्या चाकांसोबत त्यांच्या संसाराचे चाकही गतिमान झाले. त्यांच्या याच अविरत काबाडकष्टाचे फळ म्हणजे आज त्यांचे संपूर्ण कुटुंब समाधानाने जीवन जगत आहे.प्रेरणादायी आदर्श
आजच्या काळात जिथे लोक छोट्या-छोट्या अडचणींमुळे खचून जातात, तिथे सिंधूबाई भोई यांनी स्वतःच्या हिमतीवर समाजात एक आदराचे स्थान निर्माण केले आहे.त्यांच्या हात गाडीवर वांगे, मिरची फुलावर विकताना सिंधूबाई हे अहिराणी भाषेतील गाणे म्हणतात…गिर्हाईक येऊन आवडीने माल विकत घेतात . त्याचे कुतूहल येणाऱ्या प्रत्येक गिर्हाईक ला आहे.त्यांच्या या जिद्दीचे आणि स्वाभिमानी प्रवासाचे विजय स्टील सेंटर परिसर आणि संपूर्ण अमळनेर शहरात कौतुक होत आहे. कष्ट आणि प्रामाणिकपणाच्या जोरावर शून्य ते विश्व कसे निर्माण करता येते, याचे त्या एक उत्तम उदाहरण ठरल्या आहेत.पतीची सावलीसारखी साथ अन् सुसंस्कारी कुटुंब
कोणत्याही यशस्वी महिलेच्या मागे तिच्या कुटुंबाची ताकद असते, याचा प्रत्यय सिंधूबाई यांच्या जीवनात येतो. या संपूर्ण संघर्षाच्या प्रवासात त्यांचे पती श्री. गणेश रामचंद्र भोई यांनी त्यांना अत्यंत खंबीर साथ दिली. सुख-दुःखात खांद्याला खांदा लावून त्यांनी सिंधूबाई यांच्या पाठीशी डोंगरासारखे उभे राहणे पसंत केले. पती-पत्नीच्या या अथांग मेहनतीचा सकारात्मक परिणाम त्यांच्या मुलांवरही झाला.आज सिंधूबाई आणि गणेशराव यांना दोन मुली आणि एक मुलगा अशी तीन अपत्ये आहेत. अत्यंत गरिबीतही या दांपत्याने आपल्या मुलांच्या शिक्षणात आणि संस्कारात कोणतीही कमतरता भासू दिली नाही. भाजीपाल्याच्या गाडीवर घाम गाळून कमावलेल्या पैशातून दोन्ही मुलींचे लग्न केले… मुलाला चांगले शिक्षण देऊन शिक्षक बनवले… संसारात अडी अडचणी खूप असतात… त्या कधीच थांबल्या नाहीत… धैर्याने व आत्मविश्वासाने काम करणे त्यांचा स्वभावच आहे त्यांनी जिद्दी च्या जोरावर आपल्या मुलांचे भविष्य सुरक्षित केले आहे. खंबीर मत…
”सुरवातीला खूप अडचणी आल्या, पण मनात एकच जिद्द होती की आपल्या मुलांना चांगले आयुष्य द्यायचे. माझ्या पतीच्या खंबीर साथीमुळे आणि ग्राहकांच्या विश्वासामुळे मी आज या टप्प्यापर्यंत पोहोचू शकले. कष्टाला पर्याय नाही,घाबरू नका, पुढे व्हा, हेच मला आजच्या महिलांना सांगावेसे वाटते.”
असे मत सौ. सिंधूबाई गणेश भोई (बेंद्रे), अमळनेर यांनी ईगल न्यूज प्रतिनिधी यांच्यासमोर व्यक्त केले
