पी.व्ही.पी. महाविद्यालयात डॉ. सुखात्मे जयंतीनिमित्त सुखडी वाटप

कवठेमहांकाळ : प्रतिनिधी  (दि.२८)

येथील पद्मभूषण वसंतरावदादा पाटील महाविद्यालयामध्ये अंतर्गत गुणवत्ता हमी कक्ष आणि संख्याशास्त्र विभागाच्या वतीने ख्यातनाम संख्याशास्त्रज्ञ,आहारतज्ञ , शेती सांख्यिकीचे प्रणेते डॉ. पांडुरंग वासुदेव सुखात्मे   यांची ११४ वी जयंती मोठ्या उत्साहात साजरी करण्यात आली. याप्रसंगी महाविद्यालयाचे प्राचार्य प्रा. (डॉ.) एम . के. पाटील यांच्या हस्ते व संख्याशास्त्र  विभागप्रमुख प्रा.
विजय कोष्टी ,सहायक प्राध्यापक गणेश सातपुते, डॉ. अण्णासाहेब सूर्यवंशी, प्रा. शीतल पाटील, प्रा. स्नेहल झरेकर यांच्या उपस्थितीत डॉ.  सुखात्मे यांच्या प्रतिमेचे पूजन करून पुष्पहार अर्पण करण्यात आला. यानंतर   प्रा. विजय कोष्टी  यांनी उपस्थितांचे स्वागत करून  कार्यक्रमाचा उद्देश, डॉ . सुखात्मे यांचे शेती, आरोग्य, नमुना निवड आणि आहार शास्त्र यातील योगदान तसेच विभागाच्या वतीने डॉ. सुखात्मे जयंती सप्ताहा निमित्त आयोजित करण्यात येणाऱ्या क्विझ, निबंध, वक्तृत्व, पोस्टर प्रेझेंटेशन, सुखडी पाककृती आणि व्हिडिओ मेकिंग उपक्रमांची माहिती दिली. सदर कार्यक्रमाचे यशस्वी नियोजन बी.एस्सी. भाग तीन च्या विद्यार्थ्यांनी केले होते. प्रास्ताविक कु.प्रणाली कोरे यांनी केले. याप्रसंगी कु. विशाखा पाटील, कु. धनश्री भोसले, कु. अमृता भोसले (बी.एस्सी. भाग ३) आणि कु. पूजा मोहिते, कु. दिक्षा गरड (बी.एस्सी. भाग २) यांनी दैनंदिन जीवनातील भूक, कुपोषण, उपासमार,अनारोग्य आणि गरीबी आदी शत्रूंचा सामना करण्यासाठी संख्याशास्त्राचा यशस्वीपणे  उपयोग करणारे  महाराष्ट्रीयन  संख्याशास्त्रज्ञ डॉ. सुखात्मे यांच्या कार्याची माहिती आपल्या मनोगतातून दिली. प्रमुख पाहुणे प्राचार्य डॉ . पाटील यांनी विद्यार्थ्यांनी समाजाच्या पर्यायाने देशाच्या विकासासाठी सांख्यिकीचा उपयोग करण्याची प्रेरणा डॉ. सुखात्मे यांच्या कार्यावरून घ्यावी, असे आवाहन केले. तसेच डॉ. सुखात्मे यांनी सुचविलेला महाराष्ट्रीयन पिठले भाकर हा रुचकर पदार्थ माणसास आवश्यक ऊर्जा पुरवितो असे स्पष्ट केले. यावेळी राजे रामराव महाविद्यालयातून बी. एस्सी. भाग तीन साठी विभागामध्ये प्रवेश घेतलेल्या कु. रोहिणी माळी आणि कु. सुप्रिया सोलणकर यांचे कु. शीतल माने व कु. वैष्णवी पाटील यांनी गुलाब पुष्प देऊन स्वागत केले तर विभागामध्ये नव्याने रुजू झालेले सहायक प्राध्यापक डॉ. अण्णासाहेब सूर्यवंशी यांचे स्वागत गुलाबपुष्प देऊन प्राचार्य डॉ. पाटील यांनी केले. त्यानंतर १९७२ च्या दुष्काळा वेळी डॉ. सुखात्मे यांनी सुचविलेला पौष्टिक पदार्थ ‘सुखडी’ चे वाटप करण्यात आले. कार्यक्रमाच्या सुरुवातीला सावित्रीबाई  फुले विद्यापीठ, पुणे चे संख्याशास्त्राचे माजी विभागप्रमुख डॉ. अनिल गोरे यांनी लिहिलेली संख्याशास्त्राची विविध क्षेत्रातील उपयुक्तता विशद करणारी कविता ऐकविण्यात आली.   कार्यक्रमाचे सूत्रसंचालन बी. एस्सी. भाग तीन मधील कु. स्वरांजली कारंडे या विद्यार्थ्यांनीने तर आभारप्रदर्शन पितांबर कल्याणकर याने केले. यावेळी संख्याशास्त्र विभागातील विविध वर्गात  शिकत असलेले विद्यार्थी उपस्थित होते. शिक्षण प्रसारक संस्थेचे अध्यक्ष बाळासाहेब शिंदे, उपाध्यक्ष सुरेश पाटील, सचिव सुदर्शन शिंदे,प्राचार्य प्रा. डॉ.एम.के.पाटील,यांच्या मार्गदर्शनाखाली सदर कार्यक्रमाचे आयोजन मोठ्याउत्साहात करण्यात आले होते.