३९ वी किशोर-किशोरी राज्य अजिंक्यपद खो खो स्पर्धा

ठाणे–पुणे–सांगलीचा किशोर गटात दबदबा तर धाराशिव–सांगली–पुणे किशोरी गटात आघाडीवर; स्पर्धेत रंगतदार सलामी

मुंबई (क्री. प्र.) २५ डिसेंबर : महाराष्ट्र खो-खो असोसिएशनच्या मान्यतेने तसेच मुंबई खो-खो असोसिएशन व श्री समर्थ व्यायाम मंदिर, दादर यांच्या संयुक्त विद्यमाने ३९ वी किशोर व किशोरी (सब ज्युनिअर – १४ वर्षाखालील) राज्य अजिंक्यपद व निवड चाचणी खो-खो स्पर्धा मुंबई शारीरिक शिक्षण मंडळ, सहकारनगर, वडाळा, मुंबई येथे दणक्यात सुरु झाली असून किशोर गटात ठाणे, पुणे, सांगलीने दबदबा राखला तर किशोरी गटात धाराशिव–सांगली–पुणे आघाडीवर आहेत.

ठाण्याचा जळगाववर वर्चस्वपूर्ण विजय (किशोर गट)
किशोर गटातील सामन्यात ठाण्याने जळगाववर सुरुवातीपासूनच आक्रमक खेळ करत ३९–१० असा स्पष्ट विजय मिळवला आणि एक डाव २९ गुणांनी सामना खिशात घातला. ठाणे संघाकडून साई धोंडकर (२.४५ व २.२० मि. संरक्षण), सचिन हुले (२.२० मि. संरक्षण व ६ गुण), अरुण गरेल (२.५० मि. संरक्षण व ४ गुण), अभय सावंत (३ मि. संरक्षण व २ गुण) यांनी सलग प्रभावी कामगिरी करत विजय निश्चित केला, तर जळगावकडून प्रीतम पावरा (१ मि. संरक्षण) याने एकाकी झुंज दिली.

पुण्याची लातूरवर धडाकेबाज सरशी (किशोर गट)
पुण्याने लातूर विरुद्ध सर्वांगीण खेळाचे दर्शन घडवत ४४–०८ असा विजय नोंदवला आणि एक डाव ३६ गुणांनी सामना जिंकला. पुण्याकडून कर्तव्य गांडेकर (३ मि. संरक्षण, व २ गुण), सोहम देशमुख (३ मि. संरक्षण), ओम वाघ (३.२० मि. संरक्षण), श्रीराज तांगडे (१.५५ मि. संरक्षण व ६ गुण), वेदांत गायकवाड (नाबाद २ मि. संरक्षण व ८ गुण) यांनी आक्रमण व संरक्षणात सातत्य राखले. लातूर संघाकडून श्रीराम कदम (१ मि. संरक्षण, २ गुण) याने चांगला प्रतिकार केला.

सांगलीचा सिंधुदुर्गवर प्रचंड फरकाने विजय (किशोर गट)
सांगलीने सिंधुदुर्ग विरुद्ध ५४–०४ असा दणदणीत विजय मिळवत एक डाव ५० गुणांनी सामन्यावर विजयी शिक्कामोर्तब केले. सांगलीकडून दक्ष जाधव (६.०५ मि. संरक्षण व ४ गुण), शुभम माने (४.४५ मि. संरक्षण व ४ गुण), समर्थ जाली (१४ गुण) यांनी उत्कृष्ट खेळ केला, तर सिंधुदुर्गकडून गौरांग मालंदकर (१ मि. संरक्षण संरक्षण) याने एकाकी प्रयत्न केले.

सांगलीची लातूरवर संयमी कामगिरी (किशोरी गट)
किशोरी गटात सांगलीने लातूर विरुद्ध ३३–१४ असा विजय मिळवत एक डाव १९ गुणांनी सामना जिंकला. मध्यंतराला सांगलीकडे २६–०६ अशी आघाडी होती. सांगलीकडून वेदिका तामखडे (२.२५ मि. संरक्षण व २ गुण), श्रावणी माने (२.३० मि. संरक्षण), आराध्या पाटील (२.३० मि. संरक्षण व ८ गुण) यांनी प्रभावी खेळ केला, तर लातूरकडून सायली देशमुख (१.३० मि. संरक्षण), संस्कृती शिंदे (१.०५ मि. संरक्षण व २ गुण) यांनी झुंज दिली.

धाराशिवचा सिंधुदुर्गवर एकतर्फी धक्का (किशोरी गट)
धाराशिवने सिंधुदुर्ग विरुद्ध ५३–१० असा मोठा विजय मिळवत एक डाव ४३ गुणांनी सामन्यात वर्चस्व गाजवले. धाराशिवकडून मुग्धा सातपुते (२.५० मि. संरक्षण व ६ गुण), भार्गवी बागल (२.५० मि. संरक्षण व ४ गुण), राही पाटील (१.२० मि. संरक्षण व ६ गुण), पियुषा पालमलकर (२.५० मि. संरक्षण व ४ गुण) यांनी दमदार कामगिरी केली, तर सिंधुदुर्गकडून ऋतिका परब (१ मि. संरक्षण संरक्षण) हिने एकहाती लढत दिली.

पुण्याची जळगाववर ठसठशीत सरशी (किशोरी गट)
पुण्याने जळगाव विरुद्ध ४०–१२ असा विजय मिळवत एक डाव २८ गुणांनी बाजी मारली. पुण्याकडून सई गरड (४.१० मि. संरक्षण), सुप्रिया करे (३.२५ मि. संरक्षण व ४ गुण), प्राप्ती देशमुख (२.३० मि. संरक्षण व १० गुण), अपर्णा वर्धे (१४ गुण) यांनी चमकदार कामगिरी केली, तर जळगावकडून सोनाली खेनगट (१, १.२५ मि. संरक्षण) हिने चांगले योगदान दिले.

उर्वरित सामन्यांचे संक्षिप्त निकाल
किशोर गट : सातारा विरुद्ध हिंगोली – सातारा एक डाव २२ गुणांनी विजयी; नाशिक विरुद्ध धुळे – नाशिक एक डाव ०९ गुणांनी विजयी; छत्रपती संभाजीनगर विरुद्ध नांदेड – संभाजीनगर एक डाव ०२ गुणांनी विजयी; सोलापूर विरुद्ध परभणी – सोलापूर २० गुणांनी विजयी.
किशोरी गट : नाशिक विरुद्ध बीड – नाशिक एक डाव १६ गुणांनी विजयी; सातारा विरुद्ध हिंगोली – सातारा एक डाव ४२ गुणांनी विजयी; ठाणे विरुद्ध परभणी – ठाणे एक डाव १० गुणांनी विजयी; रत्नागिरी विरुद्ध नांदेड – नांदेड ०७ गुण व ३० सेकंद राखून विजयी; सोलापूर विरुद्ध रायगड – सोलापूर एक डाव ३० गुणांनी विजयी.

पहिल्या दिवसाचे ठळक संकेत
पहिल्याच दिवशी बलाढ्य संघांच्या एकतर्फी विजयांमुळे पुढील फेऱ्यांत अत्यंत चुरशीचे, वेगवान आणि उत्कंठावर्धक सामने रंगणार असल्याचे स्पष्ट संकेत मिळाले असून राज्य अजिंक्यपदाची लढत अधिकच रंगतदार होत चालली आहे.